Klajdi Caca është një student që si gjithë bashkëmoshatarët e tij duhet të sigurojë vetë shpenzimet e shkollimit, pasi prindërit i ka të papunë.
Në një bisedë me kryetarin e Forumit Rinor të Partisë Demokratike, Belind Këlliçi, ai rrëfen vështirësitë e studentëve shqiptarë dhe jetesën e shtrenjtë që rezervon kryeqyteti.
Klajdi, student i vitit të dytë master në Universitetin e Arteve, ngre shqetësimin edhe për mësimin online që ka kosto, por edhe nuk është aspak efektiv.
Bashkëbisedimi
Këlliçi: Sot jemi me Klajdi Cacën, një student viti i dytë master, me një histori si mijëra histori të tjera të studentëve shqiptarë që përballen me një realitet shumë të hidhur, që propaganda nuk na lejon ta shohim, por që shpresojmë që shumë shpejt ne do ta ndryshojmë këtë realitet të hidhur për të gjithë studentët shqiptarë.
Caca: Unë jam student i Universitetit të Arteve, jam viti i dytë pedagogji muzikore, master. Kam 5 vite që unë bëj universitetin, ndërkohë që jam edhe në punë.
Je i detyruar dhe të punosh?
Caca: Jam i detyruar edhe të punojë për arsye se unë kam të dy prindërit pa punë. Ata nuk arrijnë dot të më mbajnë në Tiranë, sepse jetesa këtu është shumë e shtrenjtë, është tarifa që është një nga problemet kryesore, është qiraja që unë jetoj me qira këtu, uji, drita. Plus tani edhe për shkak të pandemisë që zhvillojmë mësimin online.
Jeni duke bërë mësimin online edhe tani?
Caca: Jemi duke bërë mësimin online edhe tani që flasim. Në këndvështrimin tim është një dështim shumë i madh, sepse në universitetin tonë, siç dihet, ne kemi edhe lëndën “Piano” dhe lëndën Piano nuk e jep dot. Si do e japësh online?!
Po me çfarë mjetesh e bën mësimin?
Caca: Ne mësimin online e kemi zhvilluar me telefon. S’kemi asnjë mbështetje nga Ministria, nga shteti, nga bashkia, edhe sistemi njëherë punon, njëherë s’punon, plus që edhe pagesa e internetit që shkon afro 30.000 lekë në muaj kosto
Pse, të duhen dy paketa?
Caca: Dy paketa që kushtojnë nga 15.000 lekë afro.
Asnjë mbështetje?
Caca: Asnjë mbështetje, zero mbështetje. Nuk mund ta vazhdojmë më në këtë gjendje. Situata është kaotike. Janë me mijëra studentë si puna ime, në kushtet e mia dhe kam vendosur jo vetëm unë por qindra e mijëra studentë si unë, siç e thash, kam vendosur që në qoftë se në vazhdim nuk do ndryshojë situata unë do largohem përgjithmonë nga vendi im.
Por shpreson që të ndryshojë edhe bashkë do ta ndryshojmë, apo jo?!
Caca: Shpresoj! Shpresoj shumë që kjo gjendje të ndryshojë sa më parë.
