E ftuar në emisionin “Opinion”, ministrja e Shëndetësisë, Ogerta Manastirliu, tregoi se kur do të vijnë dozat e tjera të vaksinës në Shqipëri dhe të fillojë vaksinimi masiv. Manastirliu tha se janë 500 mijë doza të kontraktuara me Pfizer.
10 mijë dozat e para të Pfizer, do të vijnë ne janar tha ministrja, ndërsa 30 mijë doza të tjera do të vijnë në muajin shkurt. Më tej, ajo theksoi se dozat e tjera të vaksinës nga Pfizer do të vijnë gjatë vitit.
Manastirliu tha se mbi një milionë doza vaksine nga Covax do të vijnë në muajin shkurt.
Ajo tregoi edhe skenaret kohore mbi vaksinimin masiv të qytetarëve. Ministrja, e paqartë dhe pa një plan konkret me data, dhe sasi dozash vaksine, tha se vaksinimi i popullatës mund të zgjasë edhe dy vite.
“Në 6 muajt e parë duam të vaksinojmë mjekët, infermierët dhe rreth 250 mijë të moshuar që kanë sëmundje. Në skenarin më ambicioz që mendojmë, është vaksinimi i popullatës në 14 muaj. Skenari i dytë është 18 muaj, dhe skenari i tretë në 24 muaj.”-tha Manastirliu.
