Alexy Krivosheev, Sekretar i Dytë i Ambasadës së Federatës Ruse në Tiranë, është dëbuar nga autoritetet shqiptare me argumentin se ka shkelur masat anti-Covid duke dalë natën pa maskë. Vendimi i çuditshëm e bën Shqipërinë vendin e parë që dëbon një diplomat me argumentin se ka shkelur masat anti-Covid.
Gjithsesi Krivosheev ka 72 orë në dispozicion për të lënë Shqipërinë, pasi u shpall person non grata.
Sekretari i Dytë i Ambasadës ruse nuk është diplomati i parë që dëbohet nga Tirana zyrtare. Tre vjet më parë, Ministria e Jashtme shqiptare njoftonte dëbimin nga Shqipëria të dy diplomatëve rusë Vladislav Filipov dhe Alexey Nikolaevich Balashov, i pari atashe ushtarak ndërsa tjetri Sekretar i Parë i Ambasadës. Në atë kohë u tha se dy diplomatët kryenin veprimtari që nuk përputhej me statusin e tyre diplomatik.
Në fakt vendimi i autoriteteve shqiptare për të dëbuar dy diplomatët rusë kishte lidhje me një vendim të disa prej vendeve të BE-së, si dhe SHBA, që dëbuan nga vendet e tyre diplomatët rusë, pas akuzave për helmimin e një ish-agjenti sekret në Londër. Në atë kohë lidhur me helmimin u akuzua Rusia dhe si kundërpërgjigje, shumë nga vendet nisën dëbimin e diplomatëve rusë.
Pak ditë më pas, Federata Ruse do të kundërpërgjigjej duke dëbuar dy diplomatë shqiptarë Albert Jerasi dhe Arben Doçi. I pari mbante detyrën e zv/ambasadorit shqiptar në Rusi, ndërsa i dyti mbante detyrën e këshilltarit të ambasadorit dhe të sekretarit të ambasadës.
Ndërkohë të tjerë diplomatë të dëbuar nga Shqipëria ishin iranianë. Nga 4 shtetas iranianë që u dëbuan dy ishin me statusin e diplomatit. Në janar 2020, Shqipëria dëboi diplomatët Mohammad Ali Arz Peimanemati dhe Seyed Ahmad Hosseini Alast.
Sipas Ministrisë së Jashtme shqiptare, diplomatët iranianë, ashtu si edhe ata rusë, kishin zhvilluar “veprimtari në mospërputhje me statusin e tyre dhe parimet e Konventës së Vjenës për Marrëdhëniet Diplomatike”.
