Kriza financiare që ka goditur futbollin, për shkak të Covid-19, është pasqyruar mbi të gjitha në merkaton e transferimeve të lojtarëve.
Edhe pse disa klube nuk janë ndalur, duke investuar miliona euro, raporti i përvitshëm i publikuar nga FIFA konfirmoi se në total janë shpenzuar më pak para dhe janë realizuar më pak blerje.
E dhëna e parë që bie në sy, lidhet pikërisht me numrin më të ulët të futbollistëve që kanë ndryshuar skuadër. Shifrat kanë qenë gjithmonë në rritje, deri në 18 047 transferimet e vitit 2019. Për 2020-n, numri ka qenë në rënie, me një total prej vetëm 17 077 transferime.
Kjo është reflektuar në mënyrë të paevitueshme edhe në rënie ne parave të shpenzuara. Nga shifra rekord e 7,35 miliardë dollarë në vitin 2019, investimet kanë rënë në 5,63 miliardë dollarë në 2020-n.
Një rënie prej më tepër se 1,7 miliardë dollarë, edhe sepse më tepër se gjysma e transferimeve globale janë realizuar nën vlerën e 500 mijë eurove.
Numri më i lartë i lojtarëve që kanë ndryshuar skuadra është nga 18 deri më 29 vjeç, ndërsa transferimet janë realizuar me futbollistë nga 180 shtete, por thuajse gjysma e tyre kanë origjinë nga 10 vendet e renditura të parat, ku kryesojnë brazilianët, të ndjekur nga argjentinasit dhe britanike. Për talentët latinë janë shpenzuar edhe më tepër para, plot 734 milionë dollarë, me podiumin që plotësohet nga spanjollët dhe gjermanët.
Italia është jashtë “Top 10”, pavarësisht se grafiku tjetër tregon që Seria A është kampionati i dytë që ka shpenzuar më tepër në botë, pas Premier League.
Ligat europiane pozicionohen në tetë vendet e para, të ndjekura nga Brazili dhe MLS amerikane. Me potencialin financiar që kanë klubet angleze, jo rastësisht Chelsea, Manchester United dhe Manchester City janë tre skuadrat që kanë shpenzuar më tepër në vitin 2020, të ndjekura nga Barcelona dhe Juventusi.
