Kryebashkiaku Erion Veliaj urdhëron familjarët e administratës së bashkisë që nesër në orën 10:00 të dalin në tubimin para Kryeministrisë për të kujtuar viktimat e 21 Janarit.
Në kushtet kur ndalohen grumbullimet, për shkak të masave anti-Covid, duket se për Rilindjen ka më shumë rëndësi prania e sa më shumë njerëzve.
Për të shmangur akuzat për përdorimin politik të administratës, Kryebashkiaku Veliaj ka zgjedhur që në tubim të marrin pjesë familjarë të vartësve të tij. Në këtë mënyrë, ai nuk do të ndodhet nën akuzë se ka çuar në tubimin përkujtimor administratën, dhe së dyti, mund të mburret se ka siguruar prezencë të madhe.
Shijak TV ka siguruar një mesazh që iu është dërguar të gjithë punonjësve të bashkisë, ku urdhërohen që nesër në orën 10:00 , të kenë prezent në këtë tubim prindërit e tyre.
Po të njëjtat burime bëjnë me dije se të njëjtin urdhër punonjësit e kanë marrë edhe verbalisht nga Drejtori i Drejtorisë së Përgjithshme të Objekteve Publike, Erind Bejko.
21 janari është një datë e shënuar për Rilindjen, pasi 10 vjet më parë organizoi një nga protestat më të dhunshme në Tiranë, duke rrethuar godinën e Kryeministrisë me orë të tëra. Fatkeqësisht në protestën e thirrur nga Edi Rama humbën jetën 4 qytetarë, ndërsa u plagosën dhe dhjetra punonjës policie, që u gjendën nën breshërinë e gurëve dhe mjeteve të tjera të forta.
