Një aksident i rëndë ndodhi para disa ditësh pranë ambasadës italiane, ku një automjet tip BMW, i drejtuar nga Stiverjan Dashi kaloi semarforin me të kuqe dhe përplasi një automjet tip “Skoda” duke e hedhur disa metra më larg. Nuk pati viktima, por dy kalimtarë shpëtuan mrekullisht nga ngjarja e rëndë.
Skënder Ismaili, shefi i Sigurisë Rrugore në Drejtorinë e Qarkullimit Rrugor ka folur për këtë aksident në emisionin “Opinion” ku tha se policia ka bërë të gjitha veprimet procedurale dhe nuk e ka fshehur ngjarjen.
“Lidhur me ngjarjen përkatëse, në të cilën policia e ka fshehur dhe nuk ka treguar të dhëna. Kjo është në Web-in e Policisë, në komunikatën e Policisë së datës 15 Janar.
Nga policia është krijuar grupi hetimor dhe janë bërë veprime procedurale dhe ka pasur një çështje penale. Në momentin e parë kanë qenë dy persona që kanë shkuar persona në spital. Kush do informacione të tjera të shkojnë të marrin informacion.
Këtu është një shkelje e rregullave të qarkullimit rrugor, ka qenë i ndaluar nga semafori me të kuqe. Ka qenë me një shpejtësi të madhe dhe ka qenë një shkelësi i përsëritur”, tha Ismaili.
Ndërkohë gazetari Spartak Koka deklaroi se shoferi që kishte shkaktuar aksidentin është shofer problematik, pasi kohët e fundit kishte marrë shumë gjoba. Ndërsa drejtori i Drejtorisë të Transportit Rrugor, Blendi Gonxhja tha se i kishte parë të dhënat për këtë shofer dhe konfirmoi që kishte pasur shumë gjoba.
“Unë i kam parë vetë të dhënat dhe për këtë person dhe ai kishte shkelje që nuk mund t’i merrje patentën përjetë, por është kontingjent i keq i rrugës”, shtoi Gonxhja.
