Zyrtare/ Mandzukic vishet kuqezi, detajet e kontratës

Mario Mandzukic ka nënshkruar me Milanin dhe tashmë është zyrtare. Kuqezinjtë kanë dalë edhe me njoftim:

“AC Milan është i lumtur të njoftojë nënshkrimin me Mario Mandzukic. Klubi dhe sulmuesi kanë rënë dakord për një marrëveshje deri në fund të sezonit, me një mundësi për ta zgjatur kontratën edhe për një sezon tjetër”, shkruhet në fillim të njoftimit.

Më pas Milani për Mandzukic shkruan: “I lindur në Slavonski Brod në Kroaci, më 21 maj 1986, Mario Mandzukic e nisi karrierën e tij si profesionist në vitin 2004 me Nk Marsonia, para se të bashkohej me NK Zagreb dhe GNK Dinamo Zagreb.

Në verën e vitit 2010 u transferua në Gjermani te Wolfsburg (60 ndeshje, 20 gola) dhe Bayern Munich (88 ndeshje, 48 gola). Në sezonin 2014/15 iu bashkua spanjollëve të Atletico Madrid dhe shënoi 20 gola në 43 ndeshje, para se të kalonte Juventusi.

Në pesë sezone me bardhezinjtë ai luajti 162 ndeshje dhe shënoi 44 gola. Në janar të vitit 2020 ai kaloi në Katar te Al-Duhail, duke realizuar një gol në shtatë ndeshje.

Mandzukic ka fituar 24 trofe, përfshirë 1 Champions League, 1 Superkupë të Europës, 1 Botëror për klube, 9 tituj kampion dhe 12 Kupa e Superkupa së bashku. Ai është shënuesi i dytë më i mirë në historinë e kombëtares së Kroacisë, me 33 gola në 89 ndeshje. Te Milani ai do të veshë fanellën me numrin 9”.

LEXO EDHE  Klubi shqiptar hedh akuza: Na dhunuan në dhomat e zhveshjes, gjykimi i Enea Jorgjit ishte skandaloz