Valentino Murataj ishte një nga afrimet e Partizanit së bashku me brazilianin Junior. Mesfushori u largua nga Bylisi për të vijuar karrierën te të kuqtë. Pak ditë më parë Murataj bëri edhe debutimin e tij me Partizanin në sfidën ndaj Skënderbeut.
Në një prononcim për “Top Channel”, Murataj foli për ditët e para te skuadra e re, debutimi dhe derbi ndaj Tiranës që do të luhet ditën e enjte.
Derbi? “Do të jetë një ndeshje shumë e veçantë për mua e shpresoj të dalim me sukses. Është një ndeshje e rëndësishme për ecurinë e kampionatin e besoj se do ta marrim si ndeshjen e radhës.
E dimë që duhet të fitojmë për shumë arsye sepse dhe rruga drejt titullit është e vështirë pasi edhe Vllaznia është shkëputur pak, por kampionati sa ka filluar dhe janë shumë ndeshje. Shpresojmë të fitojmë këtë ndeshje dhe të ruajmë vazhdimësinë.
Ditët e para te Partizani? “Normalisht e prisja që lojtarët të më afronin pasi disa I njihja edhe më parë. Është një emocion i madh të luaj për Partizanin pasi kam dalë edhe nga moshat e jam përshtatur shumë mirë”.
Debutimi ndaj Skënderbeut? “Ishte një emocion i veçantë, normalisht si ndeshja e parë, por kushtet nuk ishin të mira për të dyja skuadrat. Trajneri na dha udhëzimet që duhet t’i fitonim të gjitha duelet një kundra një pasi kështu mund të fitonim ndeshjen edhe kështu ndodhi”.
