Interi ka arritur një fitore të madhe ndaj Juventusit duke i mposhtur me rezultatin 2-0.
Një përballje emocionuese që gjithmonë i ka dhënë tonusin futbollit italian ndër vite, që këtë herë përfundoi me triumfin e zikaltërve ndërsa për Juventusin rezultoi një zhgënjim i madh.
Interi kaloi në avantazh shumë shpejt në minutën e 12-të. Arthuro Vidal arriti t’i shënojë ish-ekipit të tij me kokë.
Zikaltërit dyfishuan shifrat me një aksion spektakolar në minutën e 52-të. Një assist prej 60 metra i Bastonit ka gjetur Barella të lirë në krah të djathtë teksa i pambuluar, mesfushori ka avancuar dhe mposhtur Szceszni.
Ndeshje totalisht e dominuar nga zikaltërit e Contes, që e kishte përgatitur në mënyrë perfekte duke bllokuar çdo manovër bardhezi të Pirlos dhe duke mbyllur sidomos fantazinë dhe kualitetin e Cristiano Ronaldo.
Përfundimisht 2-0 me Interin që shkon në kuotën e 40 pikëve, ndërsa Juventusi mbetet me 33 pikë dhe kjo humbje zvogëlon shanset e tyre për të mbrojtur titullin kampion.
