Pesë humbje në 6 ndeshjet e fundit dhe një barazim ka regjistruar Kukësi në këtë sezon, një skuadër e investuar për titullin kampion, por që dalëngadalë po del nga objektivat dhe ka rënë në krizë të thellë.
Në ndeshjen e javës së 14 me Vllazninë reagimi nuk erdhi dhe shkodranët ikën me tre pikë më shumë nga “Elbasan Arena”, duke zhytur në krizë të thellë verilindorët. Presidenti i nderit, Safet Gjici është përpjekur ta marrë situatën në dorë dhe mësohet se ka lëvizur në këtë aspekt.
Dje, nën drejtimin e tij, është zhvilluar një mbledhje me të gjithë pjesëtarët e klubit, ku nuk kanë munguar aspak kritikat e tij kundrejt pjesës më të madhe, veçanërisht lojtarëve.
Bëhet me dije se në këtë mbledhje është vendosur edhe në lidhje me trajnerin. Rrahman Hallaçi nuk do të vijojë të jetë trajner i parë dhe në krye të skuadrës do të vendoset një tjetër strateg.
Thashethemet flasin për një marrëveshje me Bledar Devollin, i cili në muajt e fundit a drejtuar Drenicën në Superligën e Kosovës. Megjithëse gjasat për këtë akord janë të mëdha, konfirmimi nga klubi dhe trajneri nuk ka ardhur ende, pavarësisht përpjekjeve tona për të marrë një përgjigje. /abcnews.al
