Akademiku dhe profesori i njohur Artan Fuga ka reaguar për mediat lidhur me studimin e paraqitur pak ditë më parë nga imunologu i njohur profesot Genc Sulçebe, sipas të cilit në Tiranë rreth 50 % e qytetarëve e kanë kaluar Covid-19. Studimi në fjalë shkaktoi reagime të shumta dhe kundërshti, përfshi këtu edhe ato nga Kreu i Urgjencës Kombëtare, Skënder Brataj, sipas të cilit niveli i infektimit në Tiranë ishte mes 25-30 %.
Ndërkohë akademiku Fuga duke u distancuar nga deklaratat e Akademisë së Shkencave, se vendi ynë e ka arritur imunitetin e tufës, për sa i përket gjendjes me pandeminë, thekson se studimi individual nuk është transparent dhe nuk është bazuar në shtyllat kryesore mbi të cilat duhen paraqitur studime të tilla.
‘Si anëtar i Akademisë së Shkencave, deklaroj distancimin tim personal nga ligjërimet në fjalë, duke i konsideruara ato të pambështetura mjaftueshëm për të qënë të mjaftueshme metodologjikisht të pavërtetuara me transparencën e nevojshme dhe të deklaruara me citim”, shprehet Fuga.
Sipas tij, ky studim i ka lënë të hapura të gjitha shtigjet për tu shdërruar në një fake news.
Ai thekson se studime të tilla nuk i shërbejnë aspak mbrojtjes së shëndetit të qytetarëve. “Studime të tilla nuk i shërbejnë aspak situatës që po kalon vendi. Ne na duhet të shtojmë procedurat e testimeve, duhet të shtojmë masat mbrojtëse, sikundër duhet të garantohet një vaksinim kombëtar dhe transparent”, shprehet Fuga.
