Shpëtim Idrizi, kryetar i PDIU, tha sot se është në negociata me kreun demokrat, Lulzim Basha, për arritjen e një marrëveshjeje mes dy partive në zgjedhjet e 25 prillit.
Idrizi tha se ka folur vetëm me Bashën lidhur me arritjen e marrëveshjes.
“Unë kam qenë në kontakte vetëm me kreun e PD-së, do të përpiqemi të arrijmë një marrëveshje, por si me marrëveshje si pa marrëveshje, si me koalicion si më vete, PDIU do të hyjë në zgjedhjet e 25 prillit”, tha Idrizi.
I pyetur se me sa koalicione do të përfaqësohet opozita në këto zgjedhje, ai tha se asgjë nuk është konkretizuar.
“Nuk ka një vendim zyrtar, ndoshta edhe LSI mund të përfshihet në listën e opozitës së bashkuar. Unë nuk di që të ketë diçka zyrtare që LSI mund të dalë e vetme në zgjedhje. Ne si PDIU jemi në kontakte vetëm me PD”, tha Idrizi.
Ai gjithashtu përmendi peshën elektorale të partisë që drejton, duke shtuar se ajo duhet të kihet parasysh dhe nuk mund të sfumohet apo mohohet.
