Shërbimi YouTube tha se ka pezulluar llogarinë e presidentit Donald Trump, pasi që ai shkeli politikat kundër nxitjes së dhunës, pas sulmit të javës së kaluar në Kapitol nga mbështetësit e presidentit.
Platformat në internet dhe kompanitë e medieve sociale po distancohen dhe po ndërmarrin veprime kundër atyre që nxitën ose u përfshinë në dhunë në Uashington.
Youtube tha në një deklaratë se “llogarisë së presidentit Trump do t’i pamundësohet të ngarkojë video të reja ose të transmetojë drejtpërdrejt për të paktën shtatë ditë, një afat që mund të zgjatet”, ndërsa janë bllokuar për një kohë të pacaktuar komentet nën videot e ngarkuara.
Kompania tha se pezullimi pasoi komentet e presidentit Trump në një konferencë shtypi, e cila u transmetua në platformë të martën në mëngjes.
Veprimi i kompanisë u ndërmor pasi që grupet amerikane të të drejtave civile i thanë agjencisë së lajmeve Reuters se ishin vendosur të organizonin një bojkot reklamash ndaj kompanisë nëse ajo nuk heq llogarinë e presidentit Trump.
Mbështetësit e presidenti Trump sulmuan Kapitolin të mërkurën, duke u përpjekur të pengonin certifikimin nga Kongresi të fitores së presidentit të zgjedhur, Joe Biden.
Presidenti Trump, i cili e ka sfiduar fitoren e zotit Biden, por pa ofruar prova, fillimisht lavdëroi mbështetësit e tij, por më vonë dënoi dhunën.
Ligjvënësit u detyruan të largoheshin ndërsa ndërtesa u sulmua nga protestuesit që thyen mbrojtjen nga forcat e sigurisë. Pesë persona humben jetën gjatë dhunës, përfshirë një oficer të policisë së Kapitolit.
Pas incidentit, rrjetet Twitter dhe Facebook hoqën llogaritë e presidentit Trump dhe eliminuan përmbajtjen që mbështeste sulmin e javës së kaluar, ndërsa Amazoni pezulloi platformë e medieve sociale Parler, e favorizuar nga shumë mbështetës të presidentit Trump./VOA/
