Prej pasdites së djeshme në stadiumin “Air Albania” ka nisur procesi i vaksinimit, i cili duket se po përdoret nga Qeveria për propogandën e rradhës, ndërsa shumë elementë nuk janë bërë transparentë.
Në një prononcim për Ora News, ekspertja e vaksinimit në ISHP, Erida Nelaj, ka thënë se aktualisht po vaksinohen të parët epidemiologët dhe se ende nuk janë hapur të 60 postacionet.
Sipas Nelajt, kjo skemë po ndiqet si mënyrë që stafi i vaksinimit të mësohet me punën, teksa mohon që deri më tani të ketë pasur ndonjë rast ku vaksina ka dhënë efekte anësore.
“Përveç stafeve shëndetësore që priten të grupuar në bazë të punës që kanë, pasi nuk mund të shkëputen të gjithë njëkohësisht, që herët sot kanë mbërritur këtu epidemiologët dhe stafet shëndetësore të njësive vendose që kanë marrë mostrat në terren dhe të testeve të shpejta, pasi konsiderohen prioritar.
Sot presim rreth 60 veta. Janë njoftuar dhe jemi përgatitur rreth 60 vaksinime. Ne nuk i kemi hapur të 60 postacionet, por deri te i 15-ti, sepse e dinim planin që ishin vetëm 60 sot. Këtë po e bëjmë edhe për t’ ja marrë dorën, pasi stafi janë trajnuar online dhe këtu në stadium. Dje ishte hera e parë dhe sot duket që ecën më mirë. Duke parë ecurinë do fillojmë të rrisim kapacitetet”, tha Nelaj.
Patët ndonjë rast me efekt anësor?
Nelaj: Jo dje s’kemi pasur asnjë problem. Kemi tre pika të urgjencës kombëtare që vëzhgojnë, por nuk ka pasur asnjë rast.
