Kryeministri Edi Rama u shpreh sot se nëse do të kishim varur shpresat te COVAX nuk do të kishim ende vaksinat. Rama tha se janë komunikimet për sigurimin e vaksinave janë zhvilluar drejtpërdrejtë me kompaninë Pfizer, ndërsa janë zhvilluar bisedime me 4 vendet e Bashkimit Europian.
Rama tha se nuk është i autorizuar që të tregojë se kush janë këto 4 vende, por sqaroi se këtu nuk përfshihet Greqia.
“Nuk është Greqia, këtë mund t’ua them me përgjegjësi të plotë, por s’jam i autorizuar që të them se me cilat shtete kemi arritur marrëveshjet dypalëshe”, tha Rama.
Pa lënë mënjanë kritikat ndaj BE-së, që sipas tij, nuk ndihmoi vendet e Ballkanit Perëndimor, Rama tha se ky qëndrim bëri që secili shtet i BE të mund të ndërtojë marrëveshje dypalëshe me vendet jashtë BE. Sipas tij, BE u tregua egoiste dhe mendoi vetëm për veten e saj, duke lënë pa ndihmë vendet jashtë BE.
Rama pranoi se angazhimi në COVAX nuk solli asnjë dobi lidhur me sigurimin e vaksinave, pasi ne do të ishim ende duke pritur.
Kryeministri tha se gjithashtu do të zhvillohen bisedime edhe me kompaninë Astra Zenica për sigurimin e dozave të vaksinave.
