Kryeministri Edi Rama tha se do të bëjë sot vaksinën kundër Covid-19, ndërsa sqaroi se ky vendim i tij, është në përputhje me atë të homologëve të tij në mbarë Botën.
“Unë do e bëj sot vaksinën për të treguar se ajo është e sigurtë, por asnjë nga anëtarët e kabinetit qeveritar, nuk do e bëjë vaksinën jashtë rradhës”, tha Rama.
Ndërsa nuk dha një shifër mbi numrin e vaksinave që kanë mbërritur në Shqipëri, ajo që dihet është fakti se përgjatë muajit janar do të vijnë në total 10750 doza.
“Janë shumë më pak se nevojat që kemi, por ne nuk mbetemi prapa vendeve të tjera. Një pjesë e dozave do të shkojnë në Kosovë për mjekët e infektivit.
Kosovën nuk do e lemë veç, jemi shumë të natyrshëm për ta ndihmuar”, tha Rama.
Ai sqaroi se vendi që ka ofruar vaksinat ka kërkuar konfidencialitet, sikundër e kanë kërkuar një gjë të tillë edhe 3 vende të tjera.
Rama theksoi se vaksinat janë në sistemin tonë ftohës, ndërsa u shpreh se një nga arsyet që ky vend ka afruar vaksinat është edhe ai që Kryeministër i Shqipërisë është Edi Rama.
Në këtë mënyrë, Rama nuk e ka fshehur faktin se ndoshta ky proces vaksinimi mund të përdoret si flamuri i fushatës së Rilindjes për zgjedhjet e 25 prillit.
