Kreu i PD-së Lulzim Basha vizitoi Sukthin për të parë nga afër familjet e prekura nga përmbytura.
Një prej banorëve, shtëpia e të cilit është përmbytur, tha se që prej një jave ka ujë në shtëpi i cili ka dëmtuar orenditë dhe gjithë tokat e mbjella.
Ai shpjegoi se në zonën e tyrë ka nevojë për ndërhyrje në sistemet e kullimet: “Kanë ardhur, nuk ia heq këtë…por ti mos hajde kur bëhet përmbytje, hajde investo”.
Një tjetër banor tha se përmbytjet ndodhin për shkak se qeveria nuk i ka përfunduar punimet: “Po të përfundojnë punimet siç duhet, nuk përmbytet këtu. Janë dhënë premtimet, por investimet sjanë bërë.”
Banorët e zonës thanë se po ashtu kanë problem të vazhdueshme me ujin e pijshëm, për shkak të problemeve në tubacione.
Basha i bëri thirrje qeverisë që të marrë masa urgjentisht për t’i ardhur në ndihmë banorëve. Kryedemokrati i premtoi banorëve se qeveria e tij do të jetë qeveria e qytetarëve, që mendon dhe investon për to.
“Mungesa e investimeve ka sjellë këtë gjendje. Faturën e përmbytjeve e paguajnë qytetarët. Ju të përmbytur, ministrat dëfrejnë në Dubai. Duhet një qeveri që mendon për njerëzit. Nuk na duhet një qeveri që mendon për vete. Jemi vend i vjedhur, jo i varfër. Asnjë justifikim për mosfurnizimin me ujë. Një qeveri që mendon për ju, nuk ju le të përmbyteni. Nëse mendonte për ju, qeveria nuk do të ishte shtruar në restorante. Nëse do mendonte për njerëzit, qeveria do të ishte këtu”, tha Basha.
