Kanë përfunduar 3 sfidat e orës 13:30 të vlefshme për javën e 13-të të Kategorisë Superiore.
Takimi mes mes Bylisit dhe Tiranës e zhvilluar në “Adush Muça” është mbyllur na barazim pa gola. Barazimi i pestë radhazi në kampionat për bardheblutë e drejtuar nga Nevil Dede, të cilët duket se kanë harruar të fitojnë, duke zhgënjyer për sa i përket rezultateve. Një pikë me vlerë kjo për të besuarit e Dovedan, të cilët janë ngjitur në kuotën e 12 pikëve.
Vlen të theksohet fakti se Tirana prej minutës së 73-të luajti me 10 lojtarë, për shkak të ndëshkimit me kartonin e dytë të verdhë të sulmuesit Danso.
Në sfidat e tjera, Laçi ka arritur një fitore 3-2 ndaj Kukësit duke e futur skuadrën verilindore në një krizë të thellë. Bardhezinjtë dominuan kundërshtarin në derbin e Veriut dhe siguruan tre pikë të rëndësishme, duke u ngjitur në vend të dytë me 20 pikë, po aq sa numëron edhe Teuta.
Emiljano Musta zhbllokoi takimin në minutën e 12-të, teksa çerek ore më vonë erdhi edhe goli i Van Dave. Kundërsulm perfekt i vendasve dhe parabolë shumë e bukur e sulmuesit afrikan të bardhezinjve. Ekipi i Duros e nisi mirë edhe fraksionin e dytë të ndeshjes.
Regi Lushkja, autori i asistit të golit të parë, dhuroi një tjetër pasim të saktë dhe Redon Xhixha dërgoi topin në rrjetë. 3-0 për Laçin dhe ndeshja e përfunduar. Gjithsesi, minuta e 64-t solli një penallti për skuadrën e Rrahman Hallaçit.
Agim Ibraimi nuk gaboi përballë Sherrit. Emiljano Musta mori kartonin e dytë të verdhë në minutat e fundit pas një faulli ndaj portierit kundërshtar dhe u largua me të kuqe (2 të verdha). Kukësi fitoi një tjetër penallti në minutën e tretë shtesë. Eze dërgoi topin në rrjetë, por nuk pati më kohë dhe në fund Laçi festoi suksesin e parë për vitin 2021.
Skënderbeu ishte shumë pranë triumfit në fushën e vështirë të Kastriotit në Kamzë, por në fund skuadra e Ndreut gjeti një gol në minutën e fundit dhe vulosi shifrat 2-2.
