Kreu i LZHK-së, Dashamir Shehi, ka konfirmuar arritjen e marrëveshjes së partive të voga me Partinë Demokratike për zgjedhjet e 25 prillit. Shehi tha se këto parti do të përfshihen në listën e kandidatëve të PD
“Ne jemi në fazën më të mirë. Kemi pasur shumë takime dhe besoj që në javën tjetër do të konkretizojmë formulën finale. Ne grupi opozitar i partive, 5 partive që kemi qenë më parë në parlament i jemi bashkangjitur listës së PD-së.
Kjo është një çështje e mbyllur. Tani do caktohen vetëm numrat dhe vendet. Deri tani mendohet që LSI do të dalë me siglën e vetë, por akoma nuk është zyrtare. Është një çështje mes PD-së dhe LSI-së. Ne kemi bërë një marrëveshje me PD-në si 5 parti të vogla.
I takon PD-së që këtë marrëveshje që ka bërë me ne, ta ndjekë ose jo me LSI-në”, tha Shehi për mediat.
Sipas tij, marrëveshja do të përcaktojë edhe bashkëpunimin mes frontit opozitar pas zgjedhjeve të 25 prillit, bazuar në peshën elektorale të çdo force politike.
