Duke filluar nga dita e martë, policia do të marrë në ruajtje stadiumin Air Albania, i cili do të kthehet në në qendër vaksinimi për COVID-19.
Sikundër ka deklaruar edhe Kryeministri Edi Rama, vaksinat e para pritet të mbërrijnë brenda muajit, ndërsa menjëherë do të nisin procedurat për shpërndarjen e saj fillimisht tek mjekët dhe personat më të rrezikuar e më pas tek pjesa tjetër e popullatës.
Nga informacionet e siguruara nga Euronews Albania bëhet me dije se në bazë të kërkesave të ekspertëve të shëndetit, do të ndërhyhet në impiantin e ndriçimit dhe ajrimit dhe se akomodimi nuk do të nisë nga pjesa e fushës së stadiumit, por nga pjesa e tribunës që do të përshtatet si qendër vaksinimi .
Rama deklaroi në datën 1 janar se janë siguruar 500 mijë doza vaksinash, por në janar do të mbërrijnë 10750, ndërsa në shkurt 30250. Më pas muaj për muaj me një progresion rritës do të mbërrijnë edhe vaksinat e tjera të dakordësuara me kompaninë Pfizer.
Dozat e para të vaksinave që do të përdoren për stafet mjekësore janë të pamjaftueshme. Ende nuk ka një strategji të bërë publike lidhur me ecurinë e procesit.
