Ndoshta radha krijohet për të krijuar idenë, se çmimi i tamponit është i lirë në vendin tonë dhe kërkesat janë të larta.
Largimi i emigrantëve nga Shqipëria pas festave ka krijuar radhë në spitalet jopublike të autorizuara nga Ministria e Shëndetësisë, për realizimin e tamponit për Covid -19.
Shumica e shteteve pritëse, kërkojnë përgjigjen e analizës për virusin Sars-Cov 2, e cila duhet të jetë kryer jo më vonë se 72 orë përpara paraqitjes tek autoritetet.
Në këto kushte, ndonëse një pjesë e shteteve e ofrojnë falas tamponin për Covid-19, në Shqipëri një i tillë kushton 8 500 lekë të reja.
Qytetarët thonë se janë të detyruar ta bëjnë, pasi në të kundërt nuk lejohen të udhëtojnë. Ata shprehin pakënaqësi për çmimin dhe vonesat.
Ndonëse në vendimin e tij për autorizimin e spitaleve private që përmbushnin kushtet për realizimin e tamponit, Komiteti Teknik i Ekspertëve deklaroi se ky shërbim do të ofrohej nga të gjitha spitalet që do të përmbushnin kriteret, qytetarët thonë se njohin vetëm këtë laborator për ofrimin e këtij shërbimi.
Por bërja e detyrueshme e tamponit, ka bërë që disa nga udhëtarët të hasin vështirësi në pikat e kalimit kufitar.
Sa i përket qytetarëve që kanë kaluar në kufi në këto ditë të para të vitit 2021, shifrat janë të larta, ku vetëm në pikat e kalimit kufitar me Malin e Zi janë afro 6500 qytetarë, në Kapshticë afro 6000 qytetarë dhe në Kakavijë afërsisht 1000 qytetarë.
Emigrantët që kthehen pranë familjeve thonë se më të nëpërkëmbur dhe të vjedhur ndihen nga institucionet e vendit të tyre, sesa në vendet ku shkojnë për të punuar dhe jetuar.
Fenomeni i pakëndshëm përsëritet sa herë që emigrantët kthehen masivisht në Shqipëri.
