Covid 19/ Sa kohë pasi ke takuar një të infektuar duhet bërë tamponi? Ja çfarë thonë ekspertët

Kur, si dhe ku ta bëni tamponin pas kontaktit me një person me Covid-19? Pse është e rëndësishme të mos bëhet pa arsye?

Këtyre pyetjeve u përgjigjen ekspertët. Mes pyetjeve që bëhen shpesh është edhe kur duhen bërë tamponët molekularë dhe kur duhen bërë ato antigjenikë.

Sipas ekspertëve, tamponi molekular duhet të bëhet, me recetë nga mjeku i familjes ose pediatri, nëse keni simptoma që i atribuohen COVID-19, ose për daljen nga izolimi të atyre që ishin pozitivë, pas të paktën dhjetë ditësh nga diagnoza. Ndërsa tamponi antigjenik mjafton vetëm për t’u kthyer në komunitet, pas të paktën dhjetë ditësh në karantinë si kontakte të ngushta me një rast pozitiv. Por edhe për raste të tjera specifike, siç është kthimi nga vendet me një incidencë të lartë të infeksioneve.

Kur nuk është i dobishëm tamponi?

Nëse jeni në kontakt të ngushtë me një rast pozitiv është e nevojshme të karantinoheni. Nëse qëndroni në karantinë për dy javë, pa simptoma, s’ka nevojë ta bëni tamponin përfundimtar. Ashtu siç nuk duhet të bëhet nëse keni pasur një diagnozë pozitive për më shumë se 21 ditë, por keni qenë pa simptoma për të paktën 7 ditë. Në këtë rast konsideroheni të shëruar.

Nëse duam të ndihemi të sigurt, a mund të bëjmë tampon?

Jo, ju nuk duhet të bëni tampon për t’u ndjerë të sigurt ose nëse keni frikë se keni pasur kontakte më të infektuar. Tamponët janë burim i çmuar dhe jo i pakufizuar, reagensët po pakësohen në të gjithë Evropën. Nëse bëhen tamponë kot, pa pasur ndonjë simptomë, atëherë më shumë dëmtohen ata që kanë vërtetë nevojë për ata. Në këtë rast keni nevojë për ndihmën e mjekëve të familjes dhe pediatërve, të cilët duhet të vizitojnë pacientët e tyre, duke shmangur rekomandimin e një tamponi, vetëm sepse pacienti e kërkon apo se fëmija ka rrufë.