Britania nisi sot operacionin “Shpresa”, duke vaksinuar pacientin e parë me vaksinën e Oksfordit. Një 82-vjeçar u bë i pari person që merr këtë vaksinë.
Por ministri i Shëndetësisë, Matt Hancock deklaroi sot për mediat se është thellësisht i shqetësuar se mutacioni i Afrikës së Jugut mund t’i nxjerrë jashtë loje vaksinat. Ky mutacion është më infektues se ai që është zbuluar në Britaninë e Madhe dhe po përhapet me shpejtësi nëpër Britani.
“Jam tmerrësisht i shqetësuar për këtë variant, prandaj morëm vendim për të kufizuar lëvizjet me Afrikën e Jugut,” tha ai.
Pak më herët ishte këshilltari i qeverisë, profesori Sir John Bell që paralajmëroi se të gjitha vaksinat e koronavirusit mund të dalin jashtë lojë për shkak të mutacionit afrikano-jugor. Profesori i Oksfordit tha se ky variant është shumë më shqetësues se ai që është zbuluar në Britaninë e Madhe.
“Mutacionet e këtij virusi janë ndryshime goxha thelbësore në strukturën e virusit. Kam një ndjesi që vaksinat mund të jenë efektive ndaj variantit britanik. Por nuk e di nëse do jenë efektive ndaj variantit afrikano-jugor”, tha ai.
Deri më tani, prodhuesit e vaksinave thonë se nuk ka të dhëna se variantet e reja do e mposhtin vaksinën.
Megjithatë frika ekziston dhe kompanitë thonë se mund të ndërmarrin hapa për të ndryshuar vaksinën në varësi të mutacioneve të virusit.
