Përparim Ademi, për të cilin gjykata e Tiranës, vendosi masën e sigurisë “arrest me burg” lidhur me vrasjen e dy motrave, Kristina Bardhi dhe Zhaneta Metani, ka përdorur fëmijën e mitur për të hyrë në apartamentin ku jetonin ato në zonën e Astirit.
Gjatë seancës gjyqësore, por edhe hetimeve të kryera, mësohet se viktimat po hanin bukë kur Ademi ka shkuar në apartamentin e tyre.
Në momentin që është hapur dera dhe motrat kanë parë që është ai, kanë tentuar të mbyllin derën. Menjëherë 59-vjeçari Përparim Ademi ka hapur zjarr, fillimisht në derë dhe pastaj në drejtim të motrave.
Ademi ka zbrazur karikatorin e armës automatike, por vetëm 5 plumba janë gjetur në trupin e viktimave. Ndërkohë që pjesa tjetër e plumbave është gjetur në muret e brendshme të banesës.
Përparim Ademi akuzohet për veprën penale “vrasje për shkak të marrëdhënieve familjare”.
Para trupës gjykuese, Ademi, i njohur edhe me mbiemrin Tela ka pranuar që para 20 vitesh ka nisur një marrëdhënie jashtëmartesore me Kristinën. Pas ndarjes me këtë të fundit, është lidhur me motrën tjetër Zhanetën.
Po ashtu, 59-vjeçari ka martesë ligjore me një grua tjetër, e cila ka pranuar se i dinte lidhjet e të shoqit, madje kishte krijuar miqësi me dy motrat që të mos prishte familjen. Ajo ka shtuar se ka pasur hyrje dhe dalje familjare me ta, madje edhe kanë udhëtuar së bashku. Përparim Ademi, para gjyqtarit Gerd Hoxha, ka pretenduar se ka një fëmijë me njërën prej motrave, por që nuk e ka regjistruar në emrin e tij.
Përparimi ka pranuar se krimi ndodhi për arsye xhelozie sepse kishte dyshime se Zhaneta kishte një marrëdhënie me dikë tjetër.
Vrasja ndodhi më 31 dhjetor, në rrugën Bajram Tusha në Astir. 59-vjeçari Përparim Ademi i qëlloi për vdekje me kallashnikov të dy motrat, Kristinën dhe Zhanetën.
Policia i gjeti të dy motrat në banesë pa shenja jete, ndërsa në vendngjarje u gjetën 26 gëzhoja kallashnikovi. Pas vrasjes, Ademi u largua me këmbë nga vendngjarja, ndërsa u arrestua 2 orë pas krimit.
