Përparim Ademi, 59 vjeç, tronditi paraditen e sotme Tiranën, ndërsa vrau me breshëri automatike, dy motrat, Kristina Bardhi dhe Zhaneta Metani.
Vrasja e dyfishtë ndodhi në zonën e Astirit. Ademi, i cili disa vite më parë përdorte edhe mbiemrin Tela, bashkëjetonte me njërën prej viktimave, dhe dyshohet se shkaku i konfliktit që çoi në ekzekutimin e dyfishtë, ishte se bashkëjetuesja kishte kërkuar të ndaheshin.
Ademi ka qëlluar me breshëri në drejtim të bashkëjetueses dhe motrës së saj, ndërsa të pranishëm në banesë ishin edhe dy fëmijë të mitur, që kanë njoftuar policinë.
Autori, pas krimit, ka lënë armën në banesë dhe është larguar në këmbë, ndërsa është arrestuar nga policia rreth 2 orë më pas.
Ai është shoqëruar në ambientet e Drejtorisë së Policisë ku po merret në pyetje nga oficerët, ndërsa janë publikuar fotot e tij dhe të viktimave.
