Ashtu siç kishte paralajmëruar sindikata e punonjësve të shëndetësisë, mjekët kanë dalë sot në protestë për shkarkimin e kolegut të tyre, mjekut të Urgjencës Kombëtare Mjekësore Ilir Allkja.
Mjekët janë mbledhur rreth orës 10:00 para Urgjencës për të shprehur indinjatën e tyre për vendimin e QSUT për kolegun Allkja. Ilir Allkja është shkarkuar nga drejtori i QSUT Enkelejdi Joti, nën arsyetimin se ka thyer etikën. Mjeku Allkja ka denoncuar shkeljet me menaxhimin e situatës të pandemisë në vend dhe problematikat e autoriteteve.
Në protestën e sotme, mjekët e konsiderojnë si të padrejtë këtë vendim, ndërkohë që kanë paralajmëruar se protestat mund të përshkallëzojnë.
“Mjeku shikohet dhe dënohet nga kodi penal vetëm kur me veprimin apo mosveprimin e tij shkakton vdekjen e personit. Ne sot shkarkojmë një mjek, kjo është e papranueshme. Nesër këtë lloj ritmi mund ta ketë kushdo në rrugën e vet, por nuk mendoj se është e drejtë. Nuk mund të dënohet një mjek përse ka sharë mbretin. Kjo është një mendësi e 90 viteve përpara”, tha kreu i sindikatës, mjeku Gentian Stroni.
