Një peticion i krijuar nga Erion Dasho po firmoset online pas pushimit nga puna të mjekut Ilir Allkja, i cili shërbente në QSUT. Aty mund të firmosë dhe të kontribuojë financiarisht çdo person që dëshiron. Ka vetëm dy orë që është krijuar peticioni dhe kanë firmosur 266 persona, ndërkohë që shenja e revoltës ndaj qeverisë duket se nuk do të përfundojë me kaq.
Me anë të një shkrimi në rrjetet sociale, Dasho thekson se mjekët duhet të bëhen bashkë në emër të Allkjas për të mbajtur një protestë para zyrës së Ramës, Ministrisë së Shëndetësisë, të zhvillojnë grevë qoftë edhe për një orë.
“Një protestë para zyrës së klarinetistit, një protestë para ministrisë së shëndetësisë, një grevë qoftë edhe njëorëshe, një peticion në median sociale, etj. do të ishin reagime të pritshme nga komuniteti i kolegëve!
Një koleg mori letrën e pushimit si dhuratë për Vitin e Ri! Familja e një kolegu nuk do të festojë nesër normalisht si gjithë familjet tona! Le të solidarizohemi me të si një detyrim minimal për bluzën e bardhë që mbajmë veshur!”, ishte thirrja e Dashos.
Tashmë mbetet për tu parë se çfarë do të ndodhë në ditët në vijim ndërsa vijojnë të vendosen firma në peticion.
