Akademia e Shkencave e Shqipërisë ka prezantuar rezultatet mbi fazën e dytë të studimit seroepidemiologjik për gjendjen e imunitetit të popullsisë në situatën e pandemisë së shkaktuar nga Covid-19, ku sipas të dhënave, rezulton se 49.5% e popullatës në Tiranë e kanë kaluar virusin.
Këto rezultate janë paraqitur nga drejtuesit e studimit, mjeku Genc Sulçebe dhe profesor Alban Ylli, në sallën “Akademikët” këtë të mërkurë.
Në studim bëhet fjalë për 49.5% të popullsisë që e kanë kaluar virusin. Tirana është qyteti më i prekur nga koronavirusi ku është regjistruar dhe numri më i lartë i të infektuarve.
Pjesë e këtij studimi u bënë disa qendra shëndetësore në Tiranë, më konkretisht qendra nr. 3,7,8 dhe 9 ku popullsia që përfshijnë këto zona është 258,000. Nga këta individë, janë marrë rezultatet e 817 qytetarëve prej të cilëve 49.6% rezultuan se e kanë kaluar koronavirusin.
“Akademia e Shkencave ka ndjekur në vazhdimësi nivelin e imunitetit të fituar në popullatë ndaj Sars Cov-2, nëpërmjet testimeve serologjike të realizuara nga specialistёt imunologë, pjesë e shërbimit të imunologjisë pranë QSUT, anëtarë e bashkëpunëtorë të Akademisë. Akademia e Shkencave, nëpërmjet E-grupit “Në ndjekje të pandemisë”, komisionit të mjekësisë e njësive pranë saj, kreu një studim paraprak për reagimin e imunitetit dhe të fituarit e autoimunitetit në muajt maj-korrik 2020. Në atë fazë u dëshmua se numri i të infektuarve ishte 6-7 për qind, disa herë më lart se numri i të prekurve përmes diagnostikimit me tampon. Nesër do të paraqiten të dhëna të reja për gjendjen e tashme. Prezantimi i rezultateve luan një rol të rëndësishëm në ndërgjegjësimin e popullsisë për masat që duhen marrë për mbrojtjen nga pasojat e pandemisë Covid -19’’, njofton Akademia e Shkencave.
