Komisioni Rregullator pranë KQZ miratoi pak ditë më parë një dokument, sipas të cilit, 4 muaj para zgjedhjeve të 25 prillit, i ndalohej subjekteve politike, deputetëve, Qeverisë, Prefektit, Kryebashkiakëve dhe institucioneve në varësi, që të shpërndanin leje legalizime, dokumente hipotekore apo çdo gjë tjetër që mund të kishte ndikim te qytetarët.
Por duket se kjo rregullore e miratuar, e detyrueshme për tu zbatuar, nuk përfillet nga ligjvënës të mazhorancës socialiste.
Anëtari i Komisionit Rregullator në KQZ, Muharrem Çakaj, gjatë mbledhjes së sotme denoncoi shkeljen Aktit Normativ për veprimtaritë e ndaluara para zgjedhjeve.
Sipas tij, deputeti i PS-së Bujar Çela ka shkelur këtë akt duke shpërndarë leje legalizimi, gjë e cila sipas tij është tërësisht e ndaluar.
“Çfarë pune ka deputeti me një dokument zyrtar të shtetit shqiptar? Dokumenti i legalizimit duhet të dërgohet me postë ose shpërndahet në sportel. Si përfundon ky dokument në duart e deputetit? Ky është një shpërdorim detyre“, u shpreh Çela.
Nuk dihet nëse ndaj Çelës mund të nisë një hetim, apo mund të merren masa administrative, por edhe vetë Ilirjan Celibashi, e ka cilësuar si të shëmtuar veprimin e ligjvënësit.
