Policia e Dibrës njofton se janë arrestuar 4 persona në shkelje duke qarkulluar jashtë orarit të lejuar, janë gjobitur shtatë të tjerë, si dhe dy subjekte që po ushtronin aktivitetin në kundërshtim me aktin normativ që detyron masat antiCovid.
“Gjatë kontrolleve, në qytetin e Peshkopisë janë konstatuar 4 shtetas duke qarkulluar me automjete në rrugë pas orës 20:30, pa arsye të domosdoshme. Gjatë kontrollit ka rezultuar se dy prej tyre drejtonin automjetet në gjendje të dehur, ndërsa dy të tjerët pa u pajisur me leje drejtimi. Në përfundim të veprimeve të para hetimore, nga shërbimet e seksionit të Policisë Rrugore në DVP Dibër u bë arrestimi në flagrancë i shtetasve: D. S., 20 vjeç dhe K. K., 38 vjeç, pasi drejtonin automjetet në gjendje të dehur; A. M., 18 vjeç dhe XH. K., 31 vjeç, pasi drejtonin automjetet pa u pajisur me leje drejtimi. Po gjatë ditës së djeshme është arrestuar dhe një 39-vjeçar, për drejtim mjeti pa leje drejtimi dhe në gjendje të dehur, si dhe janë ndëshkuar me masë pezullimi i lejes së drejtimit, për qarkullim pas orarit të lejuar, 3 drejtues të tjerë mjetesh”, njoftoi policia.
Materialet procedurale do t’i referohen Prokurorisë Dibër, për veprime të mëtejshme. Drejtoria Vendore e Policisë Dibër u bën thirrje qytetarëve të zbatojnë masat anticovid dhe të mos dalin nga banesat e tyre pas orës 20:30 deri në orën 06:00, shtuan të njëjtat burime.
