Nga Gjergji Koja
Viti 2021 konsiderohet si mundësia e ndryshimit, kjo lidhur me faktin se në muajin e katërt të tij, mbahen zgjedhjet parlamentare.
Pavarësisht përpjekjeve për të provokuar zgjedhje të parakohshme, Edi Rama, arriti të mbyllë edhe mandatin e dytë si Kryeministër, ndërsa nuk ka fshehur ambicien për një tjetër mandat, të tretin.
Ky mandate, Edi Ramës mund t´i duhet thjesht për të arshivuar për herë të parë në 30 vitet e pluralizmit shqiptar “trofeun e tretë” si Kryeministër, edhe pse nuk ka një bilanc të qeverisjes së tij në 8 vite.
Në anën tjetër është Lulzim Basha, kreu i PD-së, për të cilin 2021 mund të jetë ai i suksesit në politikë dhe kjo varet tashmë tërësisht prej tij.
Basha ka një terren të shtruar më së miri nga kundërshtarët politikë për të realizuar ambicien e fitores së mandatit të parë si Kreu i Qeverisë, dhe ndaj ai ka shansin që 2021 të cilësohet si viti i tij politik.
U shfaq në politikën shqiptare në 2005, u konsiderua si ylli në ngjitje i PD-së, drejtoi 3 ministritë më të rëndësishme në Qeverinë Berisha dhe në 2011 arriti të thyejë mitin e Edi Ramës në Bashkinë e Tiranës, pas 3 mandatesh që qeverisi Kryeqytetin.
Dy vite më pas, pra në 2013, arriti të marrë drejtimin e Partisë Demokratike, e cila pothuajse doli e shkatërruar nga zgjedhjet. Në 2015 ishte sfida e parë elektorale, ajo për zgjedhjet vendore, ku Basha humbi, ndërsa nisën krahasimet nëse ishin fituar më shumë apo më pak vota se zgjedhjet e 2013-ës.
Në 2017, pati shansin për të mundur Edi Ramën në një proces zgjedhor, ku palët garonin pa koalicione, secili kishte fushën e tij. Sërisht rezultati ishte negativ, megjithëse pati më pas denoncime për manipulime votash, presione dhe rezultat të tjetërsuar. Zgjedhjet u paraprinë nga marrëveshja e 17 majit, ku mes Ramës dhe Bashës u arrit që gjysmën e Qeverisë, PD ta merrte nën kontroll përmes ministrave të cilësuar si “teknikë” edhe pse ishin një zgjedhje e drejtpërdrejtë politike e kreut demokrat.
Në politikë, Basha hipotekoi me firmën e tij “made in Lulzim” dy vendime të panjohura më parë: djegien e mandateve të deputetëve dhe bojkotimin total të zgjedhjeve vendore të 2019-ës.
Deri në 2019-ën politika shqiptare ishte mësuar me bojkote deputetësh, që nuk kalonin 6 muaj, aq sa përcaktonte ligji për humbjen e tyre. Por në asnjë moment nuk kishte ndodhur një djegie në bllok mandatesh, vendim që u pasua nga deklarata të forta, deri kërcënuese të ndërkombëtarëve.
Po kështu ishte edhe vendimi për të mos hyrë në zgjedhje, ndërsa deri në të njëjtin vit, momenti i vetëm që një forcë largohej nga procesi ishte ai i 1996-ës, kur socialistët lanë në mes garën.
Basha shkoi një hap më tej, pra nnuk hyri fare në një proces, edhe pse u tentua të mbushej boshllëku që u krijua nga mungesa e partisë kryesore opozitare.
Pra ai ka provuar se është një lojtar i paparashikuar në politikë. Është një nga ato lojtarët që e nis betejën dhe mund ta lerë në mes, mund të ndërmarrë vendime ekstreme, sikundër mund të ulet në bisedime, si 17 maji i 2017-ës dhe të nënshkruajë marrëveshje, të cilat vështirë se zbardhen.
2021 është një tjetër mundësi politike për kreun e PD-së, ndoshta më e mira në 8 vitet e tij si lider i kësaj partie.
Nëse fiton zgjedhjet, ai automatikisht është Kryeministër. Nëse i humbet, mund të humbasë edhe karrigen e kryetarit të PD-së. Pra, do t´i duhet të luajë fort dhe mbi të gjitha karrierën e tij politike, ose e thënë troç, gjithçka për gjithçka.
Por, sërisht ai mund të jetë çelësi i zgjidhjes së një krize politike, nëse asnjë nga forcat politike, në qeveri dhe opozitë, nuk arrijn të dalë fituese e vetme, pra të sigurojnë 71 mandatet.
Megjithëse duket si një mundësi e vogël që kjo të ndodhë, pra një ndarje mandatesh 70 me 70, sërisht Basha mund të ketë çelësin e zgjidhjes, duke dakordësuar një bashkëqeverisje.
Pavarësisht se nga deklarimet publike kjo përjashtohet, nuk është çudi të ndodhë, veçanërisht në një vend, ku telefonatat e diplomatëve, ndryshojnë qëndrime, ulin palët në bisedime dhe arrihen marrëveshje.
Me çdo lloj situate politike, Basha duket se është paracaktuar si personazhi i vitit të ri.
