Jasir Asani pret një fitore edhe në Laç këtë mesjavë, pas asaj fitoreje bindëse ndaj Kukësit, ku ai shënoi golin e parë që rihapi sfidën dhe u dha mundësi të kuqve të bëjnë lojën e tyre dhe në fund të shënojnë edhe katër gola.
Në prononcimin e dhënë pas ndeshjes për “Panorama Sport”, futbollisti i kuq kërkon që ekipi të qëndrojë me këmbë në tokë dhe të rikthehet aty ku i takon.
Ashtu si në fushë ku e bën shpesh me kundërshtarët, Asani driblon në lidhje edhe me të ardhmen e tij dhe zërat që e lidhin, pse jo, me Tiranën, duke thënë se ka një kontratë dhe me të tjerat merret menaxheri i tij.
Morët tri pikë shumë të rëndësishme me Kukësin, ku shënuat edhe golin që hapi sfidën. Si ndiheni?
Ishte një ndeshje e vështirë, por besoj që rasti ku shënova golin i dha qetësinë ekipit dhe më pas e morëm ndeshjen ashtu siç na takon. Atë bëjmë gjatë gjithë javës, për ta mbajtur topin sa më shumë, dhe më pas me shënimin e golit bëmë diferencën dhe arritëm të shënonim edhe katër gola.
Ishte Partizani më i mirë apo nuk ishte Kukësi në formë?
Mendoj se ishte Partizani shumë mirë sesa Kukësi i dobët. E vlerësuam ndeshjen që nga minuta e parë dhe besoj se të gjithë dhanë maksimumin dhe ia arritëm qëllimit tonë.
Hapet merkatoja.Ku do ta shohim Asanin në të ardhmen, pasi qarkullojnë zëra për largim, madje edhe te Tirana?
E ardhmja? Është herët për të folur, kam ende kontratë, ia kam lënë në dorë menaxherit.
