Inspektorati i Lartë i Drejtësisë i është drejtuar me një letër ministres së Drejtësisë, Etilda Gjonaj, të cilës i kërkon ndryshimin e kritereve ligjore lidhur me përzgjedhjen e inspektorëve.
ILD kërkon që kriteri prej 13 vitesh eksperiencë pune për një kandidat që aspiron për t’u bërë pjesë e kësaj strukture, të ulët në 7 vite.
“Gjatë kësaj periudhe 10 mujore janë identifikuar disa problematika në parashikimet ligjore të cilat kanë impakt të drejtpërdrejtë në funksionimin e Zyrës së ILD.
Këto problematika janë bërë prezent edhe në takimet e organizuara me përfaqësues të organeve të reja të sistemit të drejtësisë gjatë muajit Tetor 2020 nën drejtimin e zv.ministrit të Drejtësisë.
Me qëllim adresimin e këtyre problematikave dhe garantimin e përmbushjes së kompetencave kushtetuese dhe ligjore të këtij organi, vlerësojnë të nevojshme marrjen e nismës për propozimin e ndryshimeve ligjore”, thuhet në kërkesën e ILD.
