Dy persona humbën jetën si pasojë e një aksidenti që ndodhi mëngjesin e sotëm në Fier. Aksidenti ndodhi në aksin Fier-Levan. Nga raportimet mësohet se viktimat janë identifikuar nga një banore e zonës, dhe ata janë Ndue dhe Pashkë Preçi, nga fshati Shtyllas.
Ata po udhëtonin te vajza e tyre në fshatin Qarr.
Mjeti tip “Toyota” me të cilin çifti udhëtonte ka dalë nga rruga dhe ka përfunduar në një kanal me ujë në anë të rrugës, nga ky Policia dhe zjarrfikësit nxorën më pas trupat e pajetë të tyre. Nuk dihet ende se çfarë e ka shkaktuar aksidentin e rëndë, ndërkohë që hetimet vijojnë ende nga ana e Policisë.
“Sot rreth orës 07:20, në vendin e quajtur “Kthesa e Qarrit”, automjeti tip “Toyota” ka rënë në kanalin me ujë anës rrugës. Si pasojë kanë ndërruar jetë dy shtetas (një mashkull dhe një femër) ende të paidentifikuar.
Shërbimet e Policisë, shërbimet zjarrfikëse dhe urgjenca mjekësore ndodhen në vendngjarje dhe po punojnë për nxjerjen e automjetit nga uji. Po kontrollohet vendi i ngjarjes nëse ka pasur persona të tjerë në automjet”, njoftoi policia.
