Partizani do të luajë sot kundër Kukësit në “Elbasan Arena”, një sfidë e vlefshme për javën e 11-të të Superiores.
Partizani vjen nga fitorja e pastër 2-0 kundër Kastriotit, sfidë ku mungoi zv.kapiteni Egzon Belica. Qendërmbrojtësi ka pësuar një dëmtim në gju, i cili ishte ënjtur, por përballë Kukësit, do të zbresë në fushë.
Belica u provua deri në momentin e fundit edhe për sfidën kundër Kastriotit, por në fund, stafi teknik vendosi të mos rrezikojë.
Në vend të 30-vjeçarit, u aktivizua Rron Broja, me mesfushorin që bëri një paraqitje fantastike, edhe pse nuk ishte në rolin e tij natyral. Por kundër Kukësit, Daja dhe stafi i tij nuk kanë pse shqetësohen për prapavijën, pasi Belica është gati.
Rikthimi i qendërmbrojtësit, do të shohë Koten të “sakrifikohet”. Broja pritet të spostohet para mbrojtjes, ndërsa Bardhi dhe Mala pak para tij. Asani dhe Solomon nga krahët, ndërsa Lukas do të udhëheqë majën e sulmit. Si Lukas, ashtu dhe Solomon, i shënuan Kukësit në ndeshjen e fazës së parë, që u mbyll me rezultatin 0-2 në favor të Partizanit.
Rikthimi i Belicës është pa diskutim një lajm shumë i mirë për “demat e kuq”, të cilët duan të marrin fitoren e dytë radhazi, pas katër ndeshjeve pa shënuar.
Formacioni i mundshëm: Hoxha, Idrizaj, Bitri, Belica, Hakaj, Broja, Asani, Bardhi, Mala, Solomon, Lukas.
