Partia Demokratike, përmes Akil Krajës, ka denoncuar dyfishimin e numrit të të punësuarve në Bashkinë e Tiranës, ndërsa akuzon Kryebashkiakun Erion Veliaj se me taksat e rritura, do të paguajë rreth 10 mijë militantë në bashki.
“Buxheti i Bashkisë Tiranë për vitin 2021 është konfirmimi i rradhës i abuzimeve dhe të keq-qeverisjes së qytetit nga Erion Veliaj.
Pavarësisht se jemi në kulmin e krizës ekonomike, Bashkia Tiranë dyfishon numrin e punonjësve krahasuar me pesë vite më parë. Taksat shkojnë për punësime partiake elektorale, jo për të ndihmuar bizneset apo rritur investimet për lulishtet e gjelbërimin e qytetit. E keqja në Tiranë thellohet gjithmonë e më shumë.
Me shtesën e parashikuar për vitin 2021, rezulton që numri i punonjësve të Bashkisë Tiranë ka arritur në 7500 persona, të cilët i kushtojnë taksapaguesëve të qytetit plot 51 milion euro në paga e sigurime shoqërore. Nëse e konvertojmë këtë shifër në kosto për ditë pune, punonjësit e Erion Veliajt i kushtojnë qytetarëve të Tiranës plot 200.000 euro dita e punës. E ripërsërisim 200 mijë euro dita e punës në paga e sigurime shoqërore”, tha Kraja.
Në vijim, ai tha se numri i punonjësve të Bashkisë Tiranë para ardhjes së Erion Veliajt 5 vite më parë në pushtet ishte 4020 persona.
“Por nëse shtojmë dhe aparatin e UKT-së, apo dhe punësimet e lidhura drejtëpërsëdrejti me Bashkinë Tiranë, në kuadër të realizimit të buxhetit të saj, në vitin 2021 mund të flasim pa frikë për një Bashki që punëson 10.000 persona.
10.000 punonjës të cilët sipas denoncimeve të ndryshme, detyrohen shpesh herë t’i bëjnë share, like apo të komentojnë postimet e propagandës bashkiake apo edhe të asaj qeveritare. 10.000 punonjës të cilët shpesh herë detyrohen të shërbejnë si dekor apo për të mbushur sallat për aktivitetet elektorale të Erion Veliajt.
Ky është rezultati i reformës territoriale. Dështimi i rradhës së qeverisë Rama. Një reformë e cila supozohej të rriste performancën e Bashkive të vendit, t’i sillte ato më afër qytetarëve duke ulur taksat dhe rritur llogaridhënien. Por nga reforma territoriale, qytetarët po marrin më shumë kriminelë në krye të bashkive të vendit, rritje të taksave, më pak demokraci dhe instalimin si askund në botë të një totalitarizmi vendor.
Rritja e rradhës së taksave dhe tarifave bashkiake shkon për të ushqyer një buxhet elektoral prej 166 milionë eurosh dhe për të paguar pagat e 10.000 punonjësve. Ky është buxheti rekord i Bashkisë Tiranë për vitin 2021”, tha Kraja.
