Sipas ekspertit ushtarak James R.Holmes, një konflikt midis SHBA dhe Kinës është më i mundshëm se kurrë.
Problemet ekonomike dhe demografike mund t’i shtyjnë kinezët të provojnë operacione kundër Tajvanit dhe Detit të Kinës Jugore.
Pekini synon një luftë të afat-shkurtër; SHBA-të do të përpiqet ta zgjasin atë, siç bënë me Japoninë në Luftën e Dytë Botërore.
“Ne jemi në një zonë të rrezikshme. Kina mund të arrijë në përfundimin se duhet të lëvizë tani ose të humbasë mundësinë përgjithmonë”.
Kjo është ajo që James R. Holmes, profesor i strategjisë detare në Kolegjin e Luftës Detare të SHBA-së në Newport, i thotë “AsiaNews” rreth mundësisë së një konflikti ushtarak midis Uashingtonit dhe Pekinit.
Kina dhe Shtetet e Bashkuara, por jo vetëm, po vendosin më shumë forca, duke shpenzuar në armatime dhe duke rritur stërvitjet ushtarake në oqeanin Indiano-Paqësor.
Ditët e fundit, një aeroplanmbajtës kinez – me ekipin e tij të shoqërimit – dhe një shkatërrues amerikan, kanë kaluar përmes ngushticës së Tajvanit, i konsideruar së bashku me Detin e Kinës Jugore si fronti më i ndjeshëm gjeopolitik në zonë.
Një luftë në Paqësor midis Shteteve të Bashkuara dhe Kinës – argumenton Holmes – është më i mundshëm se kurrë dhe për arsye që mund të duken kontradiktore.
“Politika kineze, – vëren ai, – buron në të njëjtën kohë guxim dhe një ndjenjë pasigurie. Nëse nga njëra anë Pekini ndihet i fortë pas sukseseve ekonomike dhe ushtarake të dekadave të fundit, nga ana tjetër duhet të kuptojë se për shkak të frikësimit të tij, ai po kthehet kundër vendeve të rajonit”.
Akademiku amerikan, ka përshtypjen se gjërat nuk po shkojnë mirë në Kinë: “Demografia nuk është në favor të regjimit; krijimi i një shteti policor “Orwellian” dhe shtypja e të drejtave të pakicave nuk janë shenjat e një regjimi që ka besim në të ardhmen e vet”.
E vetëdijshme për dobësitë e veta, është e mundur që Kina ta shikojë këtë si “momentin e saj ushtarak”, thotë Holmes: ndoshta një mundësi kaluese.
Udhëheqja Komuniste tani ndihet e fortë, por ka frikë se tendenca e ardhshme është e pafavorshme: “Nëse prisni që gjërat do të përkeqësohen për ju brenda një viti, tundimi është që të veproni tani pasi situata ju favorizon”.
Një skenar i mundshëm i luftës, mund të shohë Kinën që përpiqet të rimarrë me forcë Tajvanin (një provincë rebele për kinezët), ose të shtrijë kontrollin e saj mbi ishuj të tjerë në Detin e Kinës Jugore.
Holmes mendon se Pekini do të përpiqet ta shkurtojë përplasjen sa më shumë që të jetë e mundur, duke mbyllur çështjen përpara se SHBA-të dhe aleatët e saj të mund të ndërhyjnë. Për kinezët, ky është “opsioni më i qartë, më i thjeshtë dhe më pak i rrezikshëm”.
Përkundrazi, ai shpjegon se Shtetet e Bashkuara të Amerikës do të dëshironin të zgjasnin çdo konflikt, jo domosdoshmërisht për vite, por aq kohë sa ta lejonin atë të mposhtte kundërshtarin ose të zmbrapste agresionin.
Sipas ekspertit të marinës, ajo që mund të lindë, është një përsëritje e pjesshme e asaj që ndodhi gjatë Luftës së Dytë Botërore.
Atëherë, Japonia e dinte se nuk mund të fitonte një konflikt afatgjatë. Nga ana tjetër, SHBA-të e zgjatën konfrontimin e luftës në mënyrë që të grumbullonin një fuqi ushtarake, të aftë të anulonin pushtimet territoriale japoneze.
