Sapo janë mbyllur 45 minutat e para të tre sfidave të orës 13:45 të vlefshme për javën e 11-të të Kategorisë Superiore.
Në Shkodër, Vllaznia kryeson 3-0 përballë Skënderbeut. Goli i avantazhit për kuqeblutë është shënuar vetëm pas 37 sekondash lojë me autor Demir Imerin. Dyfishimi i rezultatit erdhi në minutën e 35-të teksa shënoi sulmuesi, Ardit Hoxhaj.
Teksa pritej vërshëllima e gjyqtarit për të drejtuar skuadrat në dhomat e zhveshjes, Vllaznia ka shënuar edhe golin e 3-të që më shumë mundësi i drejton drejt fitores së radhës. Ishte sërish Hoxhaj autori i golit duke siguruar dopietën personale.
Në Kamzë Bylisi kryeson 1-0 ndaj Apolonisë. Momenti që ka bërë diferencën ishte në minutën e 22-të, aty ku mesfushori Nigerian, Anthony Beji arriti të shënojë.
Me të njëjtin rezultat kryeson edhe Kastrioti ndaj Laçit. Vendasit befasuan miqtë në minutën e 24-t me anë të Indrit Prodanit.
