Kryetari i Partisë Demokratike, Lulzim Basha zhvilloi një takim me studentë të Drejtësisë. Gjatë takimit, studentët folën për problematikat e tyre, si tarifat e kripura të studimit, vështirësi në mësimin online, reduktimi i orëve të mësimit, si dhe gjendja e tyre e vështirë ekonomike që i detyron të punojnë për të përballuar studimet.
Juristët e rinj po ashtu u shprehën të shqetësuar nga mungesa e Gjykatës Kushtetuese funksionale.
Kryetari i PD tha se 25 prilli është dita e një bashkimi të madh.
“E keqja synon të na mbajë të ndarë. 25 prillin ta kthejmë në një energji për ndryshim të vërtetë. Fakulteti i Drejtësisë në UT mund të kthehet në fakultet model. Europa ka mjaft programe për të financuar në arsimin e lartë. Europa njësoj si shqiptarët sytë për ndryshim i ka nga rinia. Studentët të gjithë së bashku janë e ardhmja e vendit. Domethënia e 25 prillit është çlirim nga pengmarrja, rikthim i shpresës. Siç liberalizuam vizat, futëm vendin në NATO, do ta kthejmë shpresën. Ndryshimi nuk mund të vijë nga një njeri apo parti e vetme. Shumica dërrmuese e shqiptarëve duan ndryshim. Pjesë e ndryshimit është lufta ndaj korrupsionit. Qeveria numëron 7.2 miliardë euro të shpërdoruara në 7 vite. Çfarë mund të ishte bërë me gjysmën e këtyre parave! Çfarë mund të ishte bërë për arsimin, për studentët! U deshën 3 vjet të plotësoheshin vakancat në Gjykatën Kushtetuese. Shumëkush thotë që drejtësia u kap nga partia në pushtet. Kjo është një arsye më shumë që më 25 Prill të ndahemi nga ky pushtet. Qeveria e ardhshme s’mund të akuzohet se e ka marrë peng drejtësinë. Meritokracia do të jetë kriteri bazë i punësimit. Që rinia ta gjejë veten këtu na duhet një ekonomi që prosperon. S’ka drejtësi me njeriun që ka kapur drejtësinë në pushtet”, tha kryedemokrati.
