Listës së gjatë të basketbollistëve shqiptarë që kanë lënë Superligën shqiptare për të shkuar në Kosovë për t’u aktivizuar këtë sezon sportiv (2020-2021) i janë shtuar orët e fundit edhe dy lojtarë të ekipit kombëtar.
Bëhet fjalë për shtatlartin Endrit Hysenagolli dhe organizatorin Klein Strazimiri. Hysenagolli rikthehet në Kosovë ku do të luajë sërish me ekipin e Bashkimi (Prizren), ku është aktivizuar edhe para disa vitesh. Shtatlarti kuqezi është dalluar gjatë aktivizimit të tij të parë në Kosovë, ku ka lënë kujtime të mira, ndaj dhe është rikthyer.
Ndërsa Klein Strazimiri do të luajë me skuadrën e Trepçës. Kjo është hera e parë për organizatorin e kombëtares kuqezi që luan në Kosovë.
Këto transferime bëhen, pasi kampionati në Shqipëri është ndalur që prej marsit të këtij viti, kur u shfaqën rastet e para me Covid-19. Që prej asaj kohe ky sport ka pezulluar çdo aktivitet, pasi qeveria ka mbyllur palestrat dhe e konsideron këtë sport si me rrezikshmëri të lartë të transferimit të virusit.
Ndaj, mjaft basketbollistë shqiptarë janë transferuar gjatë këtyre dy muajve të fundit në Kosovë./ Telesport
