Përfundon me lirimin nga qelia të pjesës më të madhe të të akuzuarve, gjykimi i dosjes ‘Bajri’.
Gjykata e Rrethit Gjyqësor Shkodër i ka dhënë fund shqyrtimit gjyqësor të një nga dosjeve më të përfolura dhe të trumbetuara në vjeshtën e vitit 2018, si një nga operacionet e para të “Forcës së Ligjit”. Megjithatë, akuzat e rënda që u ngritën ndaj të arrestuarve, për grup të strukturuar kriminal apo vrasje janë rrëzuar gjatë shqyrtimit të çështjes.
Dënimet
Kështu, Gjykata ka pranuar pjesërisht konkluzionet e avokatëve mbrojtësve, për aplikim të gjykimit të shkurtuar, duke vendosur:
- Behar Bajri deklarohet fajtor për veprën penale “Organizim i lotarive të palejuara në bashkëpunim” dhe dënohet me 3 muaj burgim.
- Safet Bajri deklarohet fajtor për veprat penale: “Përcaktim i rezultateve në garat sportive për qëllim të fitimit pasuror, e kryer në bashkëpunim”, armëmbajtje pa leje dhe organizim i llotarive sportive në bashkëpunim” dhe dënohet përfundimisht me 2 vite e 6 muaj burgim.
- Ilir Bajri, deklarohet fajtor për kryerjen e veprës penale të armëmbajtjes pa leje dhe dënohet përfundimisht me 1 vit e 8 muaj burgim.
- Astmer Bilali deklarohet fajtor për veprat penale: Armëmbajtje pa leje, përcaktim i rezultateve sportive dhe ndërtim i paligjshëm dhe dënohet përfundimisht me 3 vite burgim.
- Ismet Idrizi deklarohet fajtor për kryerjen e veprës penale të armëmbajtjes pa leje dhe dënohet përfundimisht me 2 vite e 6 muaj burgim.
- Emrah Plaku deklarohet fajtor për kryerjen e vepave penale të armëmbajtjes pa leje e organizim i llotarive të palejuara dhe dënohet përfundimisht me 2 vite burgim.
- Sirjan Alija deklarohet fajtor për kryerjen e veprës penale organizim i llotarive sportive në bashkëpunim dhe dënohet me kusht për katër muaj.
- Ardit Smaijli deklarohet fajtor për armëmbajtje pa leje dhe dënohet me kusht për tetë muaj.
- Samet Halluni deklarohet fajtor për deklarohet fajtor për kryerjen e veprës penale organizim i llotarive sportive dhe dënohet me 3 muaj burgim.
Në përfundim të gjykimit, shumica e të dënuarve lirohen nga qelitë pasi koha e paraburgimit e vuajtur vlerësohet se ka likuiduar kohën e dënimit të dhënë.
Në burg, mbeten vetëm Ilir Bajri pasi po shqyrtohet kërkesa e autoriteteve italiane për ta ekstraduar si dhe Safet Bajri për shkak se po vuan dënimin për të cilin është dënuar në Belgjikë.
