Akademiku Artan Fuga përmes një postimi në rrjetet sociale ka denoncuar mënyrën se si Albtelecom trajton klientët e tij.
Fuga jo pa ironi shkruan se më lehtë mund të kontaktosh me kreun e OKB, se sa mund të flasësh me Albtelecom.
“Agjenci telefonie që vetëm në telefon nuk përgjigjet dhe nuk ke ku ankohesh kur ndjen se po trajtohesh si qen, si një karthi e hedhur tej nga era në mal, je kapur rob me lloj lloj klauzolash, kur në dyqan të thonë : mbylle një çikë atë derën!”, shkruan Fuga.
Postimi nga Artan Fuga
Më lehtë sesa të kontaktosh Albtelecom mund të flasësh me Kryetarin e OKB, me kancelaren, me kryetaren e Komisionit europian, me Putinin, nuk e di me kë tjetër, mbase me Zotin është shumë më lehtë, të jep akses!
Por, me Albtelecom jo, agjenci telefonie që vetëm në telefon nuk përgjigjet dhe nuk ke ku ankohesh kur ndjen se po trajtohesh si qen, si një karthi e hedhur tej nga era në mal, je kapur rob me lloj lloj klauzolash, kur në dyqan të thonë : mbylle një çikë atë derën!
Ore mos kujtojnë këta se marketingu është teknikë për ta keqtrajtuar klientin? Për t’ja hedhur sa t’a fusësh në kllapa?
Nuk di për Zotin, por po harxhoj pa fund impulse dhe nuk i kap dot!
A di ndokush ndonjë metodë njerëzore, jo të dhunëshme?
