Edhe pse bota është e lumtur që vaksinat për luftën ndaj Covid-19 janë prodhuar dhe ka nisur vaksinimi, një raporti alarmues nga Interpol vë theksin tek mafia.
Interpol paralajmëron se grupet mafioze dhe ato kriminale janë të përgatitura për grabitjen dhe trafikimin e dozave në tregun e zi.
Me shpërndarjen e vaksinave do të rritet në mënyrë drastike edhe kriminaliteti”, thotë drejtuesi i Interpol, Jurgen Stock, për mediat gjermane.
“Do të shohim grabitje në magazina dhe sulme të ndryshme në operacionet e shpërndarjes së vaksinave. Korrupsioni do të jetë mbizotërues në shumë vende, që njerëzit ta marrin më shpejt këtë të mirë shumë të çmuar”, shtoi ai.
Nga ana tjetër, ai shton se përhapja e virusit, i shfaqur fillimisht në Azi e më pas në të gjithë botën, është pasuar me një valë kriminaliteti, fenomen të cilin e konsideroi një pandemi më vete.
“Grupet kriminale kanë menduar që nga minuti i parë i përhapjes se si të përfitojnë nga Covid-19. Në vend që të përfitojnë nga ilaçet, janë spostuar shumë shpejt në produkte false higjieno-sanitare, antiviralë dhe maska false”, u shpreh Stock.
