Kosova ndodhet në një ngërç politik. Kryeministri, Avdullah Hoti, sërish nuk dha një datë për mbajtjen e tryezës së liderëve të partive kryesore politike, në të cilën do të diskutohet lidhur me postin e presidentit.
Shefi i qeverisë theksoi se po mundohet të organizojë sa më parë një takim, teksa lëshoi dhe një paralajmërim.
“Jemi duke u munduar të organizojmë sa më parë takimin, tash ftesa formale të shkruara nuk kemi bërë, por jemi duke tentuar që sa më parë të gjejmë një zgjidhje. Unë besoj që edhe janari është vonë, por gjithësi sa më parë”, tha Hoti.
Alternativë mbeten zgjedhjet e parakohshme parlamentare. Kryeministri foli edhe për dialogun me Serbinë, ndërsa komentoi deklaratën e presidentit, Aleksandër Vuçiç, se njohja e Kosovës nuk do të vijë të paktën deri në vitin 2022.
“Dialogu si proces është çështje muajsh. Duhet të vijmë në fund të këtij procesi shumë shpejt. Unë do të doja që ta përmbyllim me njohje reciproke, nëse nuk arrijmë të përmbyllim me njohje reciproke nuk mund të arrijmë as marrëveshje. E ne do të vazhdojmë të rrugëtojmë dhe ekzistojmë si shtet i pavarur dhe të punojmë për integrimet euroantlantike”, u shpreh kryeministri.
Hoti foli edhe për kërkesën për dorëheqje të drejtorit të Agjencisë së Kosovës për Inteligjencë, Kreshnik Gashi, duke thënë se këtë vendim e mori në bazë të kompetencave të tij kushtetuese.
