Autoritetet në Kili kanë vendosur një gjobë prej 3500 dollarësh ndaj presidentit Sebastian Pinera për shkelje të rregullave kundër koronavirusit.
Menjëherë pas këtij vendimi erdhi dhe reagimi i vetë kreut të shtetit, i cili kërkoi falje për foton pa maskë që bëri me një grua gjatë një shëtitje në plazh.
Pinera pranoi se duhet të kishte mbajtur maskë kur gruaja e re i kërkoi të bënin një foto në plazhin e qytetit të tij të lindjes në Cachagua.
Kili ka ndër ligjet më të forta për sa i përket mbajtjes së maskës në publik. Shkeljet parashikojnë masa administrative të rënda, deri dhe burg.
Sipas universitetit, Johns Hopkins, që nga nisja e pandemisë në Kili numërohen 581 mijë të infektuar dhe rreth 16 mijë viktima.
