Roland Bicerri, efektiv i Forcave të Ndërhyrjes së Shpejtë, humbi jetën mesditën e sotme, pasi u qëllua aksidentalisht me armën e tij të shërbimit nga djali 7-vjeçar.
Nga raportimet mësohet se Bicerri ndodhej me miqtë e tij, në një prej lokaleve pranë shtëpisë, ku po luante bilardo.
Armën e shërbimit efektivi duket se e ka lënë në një çantë, ku siç duket djali i tij, e ka nxjerrë dhe e ka përdorur në mënyrë të pavetëdijshme. Nga shkrepja e armës, një plumb e ka qëlluar Bicerrin në qafë, duke i shkaktuar edhe humbjen e jetës.
Bicerri ka mbetur fillimisht i plagosur por më pas ka ndërruar jetë si pasojë e plagës. Policia njoftoi se grupi Hetimor dhe shërbimet e Policisë ndodhen në vendngjarje dhe vijon puna për sqarimin e plotë të rrethanave të ngjarjes.
