Agjencia Europiane e Barnave është nën presion për të miratuar sa më shpejt vaksinën e Pfizer dhe BioNTech anti-covid.
Sipas Reuters dhe mediave gjermane, Komisioni Europian dhe qeveritë e vendeve anëtarë te BE kërkojnë miratimin sa më shpejt të kësaj vaksine.
Në veçanti, Gjermania është shteti që bën presion që vaksina kundër Covid-19 të miratohet sa më parë. Zyra e Kancelares gjermane Angela Merkel dhe Ministria gjermane e Shëndetësisë kërkojnë që Agjencia Europiane e Barnave të aprovojë vaksinën më datë 23 Dhjetor, nga data 29 Dhjetor që ishte planifikuar paraprakisht, shkruan gazeta gjermane Bild.
Presioni mbi Agjencinë Europiane të Barnave nga vendet e BE u shtua sidomos pasi Britania miratoi përdorimin e vaksinës së Pfizer për qytetarët e saj.
