Një variant i ri i koronavirusit është identifikuar në Mbretërinë e Bashkuar. Njoftimin e ka dhënë ministri i Shëndetësisë, Matt Hancock.
Sipas ministrit, të paktën 60 nga autoritetet lokale kanë identifikuar infektime nga varianti i ri i virusit.
Mbretëria e Bashkuar ka njoftuar menjëherë OBSH-në lidhur me këtë fakt dhe shkencëtarët kanë nisur kryerjen e studimeve të detajuara.
Sipas Hancock, nuk ka të dhëna që sugjerojnë se ky variant i virusit është më agresiv, apo rezistent ndaj vaksinës dhe se kërkimet duhet të vijojnë.
“Ne kemi identifkuar mbi një mijë raste infektimesh me këtë variant, në jug të Anglisë, por rastet janë identifikuar në rreth 60 zona“, u shpreh ministri.
Profesori Alan McNally, një ekspert në Universitetin e Birmingham, i tha BBC, se nuk duhet të krijohet panik.
“Të mos bëhemi histerikë. Nuk do të thotë se është më i transmetueshëm, më infektues apo më i rrezikshëm“, tha McNally për këtë variant të ri.
Nga ana tjetër, Dr Jeremy Farrar, u shpreh se mund të jetë një çështje serioze.
“Kërkimet dhe mbikqyrja duhet të vijojnë dhe ne duhet të marrim masat e nevojshme për të qëndruar përpara virusit“, tha ai.
