Nga Boldnews.al
Drejtori i Ujësjellës Kanalizimeve në Sarandë, Sheme Lula, i cili para pak vitesh bëri një eksperiment social në qytetin bregdetar, duke i lënë banorët pa ujë për të parë nëse do reagonin, ka vijuar “bëmat” e tij. Sipas dokumenteve që ka siguruar “Bold News”, z.Lula ka zhvilluar një procedurë konkurimi, ku fituese ka shpallur firmën e cila ka ofruar më… shumë!
Duket se z.Lula ia ka marrë dorën tenderëve, pasi edhe pak muaj më parë, bëri procedurë për të furnizuar me autobote sarandiotët, në qytetin që mburret me ujin që buron nga Syri i Kaltër. Kësaj herë ka goditur me dokumentet, pasi me kaq shumë “bëma” ai vijon në detyrë, pasi është “mjeshtër” i letrave. Përveç kësaj, ka lidhje të forta edhe me deputetë të Rilindjes, denoncime të cilat janë publikuar edhe më parë në “Bold News”.
Sipas dokumenteve që ka siguruar “Bold News”, në fillim të muajit dhjetor 2020, Ujësjellës Kanalizime Sarandë ka bërë procedurën e tenderit “ndërtim i kanalizimeve të ujërave të zeza në bllokun mbi rrugën numër 5, në lagjen numër 3”. Lexoni pak shifrën e tenderit; 32.039.144 lekë. Normalisht, sa për “sy e faqe” në dokumente shkruhet se kriteret e përzgjedhjes së fituesit janë “çmimi më i ulët”.
Por, në këtë procedurë, nuk ka ndodhur diçka e tillë. Le të analizojmë shifrat e ofruara për këtë shërbim. Kompania me ofertën më të ulët ka qenë “FLED” me ofertë 22.204.150 lekë. E dyta “SHENDELLI” me 22.785.530 lekë, e treta “MANE/S” me 25.169.020 lekë dhe e katërta BOE “I.C.C GROUP” dhe “2Z KONSTRUKSION” me ofertë 31.821.600 lekë. Kjo e fundit, është shpallur edhe fituese. Por, le të bëjmë një veprim të thjeshtë matematikor.
Ofertën më të lartë e zbresim me ofertën më të ulët, ku diferenca është plot 9.617.450 lekë. Pra, taksapaguesve sarandiotë veprimi i z.Lula do t’u kushtojë rreth 100 milionë lekë, ose 1/3 e vlerës së të gjithë tenderit. Dhe, e gjitha me një të rënë të lapsit.
Në dokumentet që kemi siguruar rezulton se z.Lula ka s’kualifikuar të gjitha firmat që ofruan më pak, me qëllim që të shpallte fituese “të preferuarën”.
Me publikimin e këtyre dokumenteve, “Boldnews” po analizon veprimet e shtetarëve, të cilët i kanë shkaktuar buxhetit plot 100 milionë lekë. Në këto dokumente thuhet se “nga shqyrtimi i dokumentacionit të 4 firmave që kanë paraqitur ofertë ekonomike, rezultoi se 3 prej OE nuk i plotësonin kërkesat dhe kushtet e DST-së të hartuar nga AK”.
Pra, nisur nga dokumentet e tenderit, ngrihen dyshime të forta se gjithçka ka qenë e paracaktuar.
