Revolta e protestuesve në qytetin e Shkodrës është derdhur mbi selinë e Partisë Socialiste. Disa nga protestuesit kanë thyer xhamat e dritareve dhe derës hyrëse të selisë së PS-së, si dhe kanë nxjerrë jashtë sende që ndodheshin aty.
Sende që më pas janë grumbulluar para derës hyrëse dhe i është vënë flaka.
“Drejtësi për Klodianin”, ishte një nga thirrjet e protestuesve që u dëgjua disa herë. U kërkua po ashtu dorëheqja e kryepolicit Ardi Veliu dhe kryeministrit Edi Rama.
Policia ndërkohë zgjodhi që efektivë me uniformë të mos ishin prezentë në zonat ku zhvillohej protesta, deri kur u ndez zjarri para selisë së PS. Pas këtyre momenteve, efektivë të FNSH mësynë në zonë dhe u hodh gaz lotsjellës për të shpërndarë protestuesit.
Efektivët kanë vendosur një kordon, ndërsa protestuesit vijojnë të qëndrojnë pranë tyre. Deri më tani, nuk ka pasur përplasje fizike mes protetuesev dhe forcave policore.
Prej ditësh, protesta po zhvillohen në disa qytete të vendit, pas vrasjes së 25-vjeçarit Klodian Rasha nga një efektiv policie në detyrë.